У Мінску пачаўся працэс па справе аб дамоўных матчах, судзяць 20 чалавек

Пра затрыманне ў Мінску і Магілёве трох арганізатараў дамоўных матчаў, былых спартсменаў, у МУС Беларусі паведамілі ў пачатку 2019 года. Яны атрымлівалі незаконны прыбытак з замежных букмекерскіх кантор. Сілавікі прапанавалі спартсменам, якія ўдзельнічалі ў дамоўных матчах, "добраахвотна і ініцыятыўна" адгукнуцца і ўсё распавесці. За гэта абяцалі вызваленне ад крымінальнай адказнасці ці яе змякчэнне. 13 чалавек адгукнуліся. Вядома, што дамоўныя гульні адбыліся ў чэмпіянаце і кубку Беларусі, у іх удзельнічалі клубы вышэйшай, першай і другой ліг ("Нафтан", "Орша", "Ліда", "Нёман-Агра", "Хімік", "Гомель"). У канцы 2019-га Следчы камітэт паведаміў пра 28 эпізодаў "супрацьпраўнай дзейнасці".

Федэрацыя футбола за арганізацыю дамоўных матчаў пажыццёва адхіліла ад гульняў Валерыя Бяляўскага і Аляксея Сучкова. Група футбалістаў адхілена на розныя тэрміны — ад аднаго года да трох. 

Папярэдні раз пра выкрыццё злачыннай схемы "дамоўных" матчаў Міністэрства ўнутраных спраў паведаміла летам 2016-га. У кастрычніку 2017 года былі асуджаныя 15 чалавек. Яны атрымалі абмежаванне волі ці штрафы. Беларуская федэрацыя футбола пажыццёва дыскваліфікавала гэтых людзей.