У МЗС адрэагавалі на паведамленні аб ДТЗ у Рызе і машыны з мінскімі дыпнумарамі
![Удзельнік ДТЗ у Рызе быў на мінскіх дыпнумарах / tvnet.lv](/sites/default/files/styles/gallery_main/public/2023-08/avto_7_10.jpg.webp?itok=I_STyk72)
Удзельнік ДТЗ у Рызе быў на мінскіх дыпнумарах / tvnet.lv
У МЗС Беларусі адрэагавалі на сюжэт пра ДТЗ у Рызе, які паказалі на адным з латвійскіх тэлеканалаў. Адзін з удзельнікаў ДТЗ расказаў, што ў яго ўрэзалася белая Audi. Кіроўца Audi, латвіец, паводзіў сябе груба, а потым увогуле уцёк з месца здарэння. Але журналісты звярнулі ўвагу на нумарныя знакі аўто і прыйшлі да высновы, што машына — "з аўтапарка беларускіх дыпламатаў".
Гэта хлусня, адказалі ў беларускім МЗС. Прэс-сакратар беларускага знешнепалітычнага ведамства Анатоль Глаз нагадаў, што "дзякуючы намаганням латвійскага боку ў Рызе адсутнічаюць беларускія дыпламаты. Аўтары інсінуацыі, напэўна, забыліся гэта ўлічыць". На самай справе не забыліся. У публікацыі медыя адзначалася, што "пасля дэманстрацый і пратэстаў, якія адбыліся пасля сумнеўных прэзідэнцкіх выбараў у Беларусі, Латвія выслала некалькіх дыпламатаў, і цяпер пасольства суседняй краіны ў Рызе закрытае".
З нагоды нумарных знакаў аўтамабіля Глаз адзначыў, што такія нумары выдаюцца замежным дыпламатам, якія працуюць у Беларусі з мінскай рэгістрацыяй.
"Мы высветлілі прыналежнасць транспартнага сродку. З меркаванняў этыкі і прыстойнасці мы не хацелі б раскрываць усіх дэталяў, але камічнасць сітуацыі ў тым, што гаворка ідзе пра аднаго з еўрапейскіх дыпламатаў, які працуе ў нашай краіне", — сказаў прадстаўнік беларускага МЗС.
Заўважым, што ў тым ДТЗ ніхто не пацярпеў. Нават аўтамабіль другога ўдзельніка быў пашкоджаны не моцна — страхоўка KASKO пакрывае рамонт.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.