У Віцебску адменены міжнародны танцавальны фестываль
Фестываль танца мадэрн павінен быў прайсці 33-ы раз / БелаПАН
У Віцебску адменены міжнародны фестываль сучаснай харэаграфіі (IFMC), паведамляе БелаПАН. Ён перанесены на 2022 год.
Фестываль танца мадэрн павінен быў прайсці 33-ы раз, але ён не адбудзецца з прычыны складанай эпідэмічнай сітуацыі ў Беларусі. Па словах арганізатараў, праграма была сфарміраваная, вылучалася фінансаванне.
IFMC адмяняюць другі раз — у 2020 годзе ён не адбыўся таксама праз пандэмію каранавіруса.
Міжнародны фестываль сучаснай харэаграфіі ў Віцебску праводзіцца з 1987 года. Так было кожны лістапад — да 2020-га. Фестываль стаў першым і да 1997 года заставаўся адзіным форумам сучаснага танца ў СССР. Праграма ўключала балетныя спектаклі, выставы, майстар-класы, лекцыі, дыскусіі, кінапаказы.
