Віктар Лукашэнка ад імя НАК раздае кіраўнікам раёнаў дзяржаўныя грошы
Віктар Лукашэнка ад імя НАК, якім кіруе, па-панску раздае дзяржаўныя грошы. Здавалася б — сродкі на развіццё спартовай інфраструктуры Капыльскага раёна мусілі б быць прадугледжаныя ў бюджэце. Але не.
Сертыфікат на 100 тысяч рублёў старшыня райвыканкама Сяргей Пілішчык атрымлівае ад НАК Беларусі з рук старэйшага сына Аляксандра Лукашэнкі. Віктар быў "абраны" кіраўніком Нацыянальнага алімпійскага камітэту Беларусі ў лютым 2021 года. Гэты "выбар" не прызналі ў Міжнародным алімпійскім камітэце.
У выніку палітыкі, якую праводзіць беларускі ўрад, большасць спартоўцаў з нашай краіны не могуць удзельнічаць у міжнародных спаборніцтвах. Часам іх не дапускаюць нават да дабрачынных мерапрыемстваў, як нядаўна адбылося з Вікторыяй Азаранка на старце US Open.
