"Вы ж апазіцыянер. Вам з уладай разам выступаць не западло?"
У Мінскім гарадскім судзе 26 снежня працягваецца судовы працэс па справе аўтараў расійскага інфармацыйнага агенцтва "Рэгнум". Дацэнта БДУІР Юрыя Паўлаўца, брэсцкага ахоўніка Дзмітрыя Алімкіна і галоўнага рэдактара часопіса "Новая эканоміка" Сяргея Шыптэнку вінавацяць у распальванні расавай, нацыянальнай або рэлігійнай варожасці або розні.
Як піша прэс-служба БАЖ, сёння дапытвалі Дзяніса Рабянка. Ён у кастрычніку 2016 года напісаў заяву ў Генпракуратуру на аднаго з падсудных — Дзмітрыя Алімкіна, які карыстаўся псеўданімам "Ала Бронь".
"У артыкуле аўтар пісаў, што беларусы не нацыя, мовы няма, а беларусы — унукі паліцаяў. Гэта ўсё мяне абурыла, і я напісаў заяву, бо я лічу, што такія артыкулы распальваюць нацыянальную рознь. Мне далі адказ з Генпракуратуры, што ўзбуджаць крымінальную справу, як я прасіў, не будуць, блакаваць рэсурс — таксама", — распавёў сведка.
У адказе Генпракуратура паведаміла, што сама звернецца ў Мінінфармацыі наконт публікацыі.
Падсудны Алімкін задаў некалькі пытанняў Рабянку. "Вы ж апазіцыянер. Вам з уладай разам выступаць не западло?" — так гучала першае з іх.
У адказ Рабянок паведаміў, што ніколі не хаваў сваіх палітычных поглядаў. А суддзя зняў пытанне, бо яно не адносіцца да сутнасці справы.
Таксама Алімкін спытаў, ці стаў сведка пасля чытання тэкстаў горш ставіцца да рускіх або беларусаў. На гэта Рабянок заявіў, што горш стаў ставіцца толькі да людзей, якія пішуць такія тэксты.
