Вярхоўная Рада Украіны прыняла закон аб медыцынскім канабісе
Канабіс / pixabay.com
Вярхоўная Рада Украіны прыняла ў другім чытанні законапраект аб медыцынскім канабісе, паведамляе hromadske.ua. За гэты закон прагаласавалі 248 дэпутатаў.
Гэты законапраект рэгулюе абарачэнне канабісу толькі ў медыцынскай, прамысловай і навуковай дзейнасці. Закон спрашчае медыцынскае выкарыстанне лекаў на аснове канабісу і даручае ўраду пашырыць пералік лекаў.
Пры гэтым распаўсюд марыхуаны не з медыцынскімі мэтамі па-ранейшаму будзе лічыцца злачынствам. Вытворчасць лекаў будзе жорстка кантралявацца на ўсіх этапах. Вырошчваць канабіс змогуць толькі юрыдычныя асобы з адпаведнай ліцэнзія і GMP-сертыфікатам, пад кругласутачным відэаназіраннем з доступам для Нацпаліцыі. Прэпараты на аснове медыцынскага канабісу можна будзе атрымаць толькі паводле электроннага рэцэпта.
У Мінздароўя Украіны назвалі прыняцце гэтага закона "гістарычным рашэннем". У ведамстве адзначылі, што гэта лекі для мільёнаў людзей — анкапацыентаў, людзей з рассеянным склерозам, пацыентаў, якія атрымліваюць паліятыўную дапамогу, ды іншых.
