Вызваленне палітвязняў: Лябедзька пра кропкавую супрацу з расійскімі сіламi
Ілюстрацыйны здымак / dpa
Ці могуць беларускія і расійскія дэмакратычныя сілы супрацоўнічаць па пытанні вызвалення палітвязняў?
“Калі глядзець па-чалавечаму і з пазіцыі кіраўніка цэнтра “Еўрапейскі дыялог”, які займаецца аналітыкай, то ў гэтым пытанні дакладна ніякіх перашкодаў няма. Гэта могуць не разумець толькі людзі, якія абсалютна далёкія ад праблемы палітычных вязняў або на іх проста спекулююць”, – адказаў Еўрарадыё Анатоль Лябедзька, беларускі палітык і дарадца Святланы Ціханоўскай.
Мы звярнуліся да спадара Анатоля, бо менавіта яго згадаў расійскі апазіцыянер Ілля Яшын падчас сустрэчы ў Варшаве.
Прысутную на мерапрыемстве беларускую актывістку цікавіла, што не так робяць беларускія дэмсілы ў сітуацыі, у якой расійскія калегі нібыта ўпэўненыя, што іх словы дзейнічаюць лепей.
Яшын адказаў на пытанне наступным чынам:
“Усё, што я хачу зрабіць, — гэта дапамагчы там, дзе я магу быць карысным. Тое, што мы робім, рыторыка, якую мы выкарыстоўваем, актыўнасць, якую мы рэалізуем, — наконт усяго гэтага мы раімся з кіраўнікамі беларускай апазіцыі. Напрыклад, калі пачалася кампанія ў падтрымку Калеснікавай, да нас звярнуліся з просьбай падтрымаць яе публічна, прыцягнуць увагу да таго, што адбываецца цяпер з Марыяй. Мы проста зрабілі тое, аб чым нас прасілі. Мы дакладна не збіраемся вучыць [беларускую апазіцыю] і паказваць, як трэба. Мы проста дапамагаем там, дзе нас просяць дапамагчы. [...] Вы думаеце, мы ведаем як? Мы проста спрабуем. Паўсюль, дзе нас гатовыя выслухаць, мы гаворым пра сваіх і пра вашых. Чужых палітвязняў не бывае”.
Пасля свайго выступлення ў Варшаве Ілля Яшын расказаў Еўрарадыё, што пра кампанію ў абарону Марыі Калеснікавай прасіла канкрэтна Таццяна Хоміч. Але ён таксама падтрымлівае стасункі з Анатолем Лябедзькам.
“З Толем мы абмяркоўвалі кампанію па іншых палітзэках”, — сказаў Яшын.
Еўрарадыё звярнулася да беларускага палітыка з пытаннем пра яго сяброўства з расійскім калегам. Выявілася, што яны ведаюць адзін аднаго яшчэ “з часоў Нямцова”.
