Яшын вядзе перамовы пра беларускіх палітвязняў? Адказ польскага МЗС і Латушкі

Таксама мы звярнуліся да намесніка старшыні Аб’яднанага пераходнага кабінета Беларусі Паўла Латушкі, які сказаў, што пытанне беларускіх палітвязняў пастаянна ўздымаецца падчас сустрэч з прадстаўнікамі польскай улады.

— Па-першае, не трэба гэта [словы Іллі Яшына] разглядаць як перамовы з польскім бокам. Гэта проста ўзняцце важнай тэмы. Трэба таксама ўзяць пад увагу, што на мінулым тыдні Аб’яднаны пераходны кабінет на чале з кіраўніцай [Святланай Ціханоўскай] меў сустрэчы з прэзідэнтам Польшчы, міністрам замежных спраў, маршалкам Сената, міністрам юстыцыі, міністрам унутраных спраў Польшчы, дзе абмяркоўвалася тэма вызвалення беларускіх палітвязняў, у тым ліку, Анджэя Пачобута (і для нас, і для польскага боку вельмі важна, каб ён таксама быў вызвалены). Гэта з’яўляецца прадметам практычна ўсіх двухбаковых сустрэчаў з польскімі ўладамі прадстаўнікоў дэмакратычных інстытутаў Беларусі.

Я думаю, што ў расійскай апазіцыі ёсць шмат справаў і задач, якімі яны таксама могуць заняцца. Хапае праблем у кантэксце агрэсіі Расіі супраць Украіны, неваеннай акупацыі, якую ажыццяўляе Расія ў адносінах да Беларусі, падтрымліваючы рэпрэсіўны жудасны рэжым Лукашэнкі. Я не маю права нікому даваць кірункі дзейнасці, але мне падаецца, што гэта з’яўлялася больш важным для расійскіх дэмакратычных сілаў.

Гэта не перамовы, гэта ініцыяванне пытання. Што тычыцца канкрэтных размоваў, то гэтыя размовы пастаянна вядуць дэмакратычныя інстытуты беларускіх дэмакратычных сілаў. І гэта з’яўляецца для нас стратэгічным прыярытэтам.

Ілля Яшын ужо не першы раз згадвае беларускіх палітвязняў. Пасля свайго вызвалення ў выніку дамоў паміж Масквой і краінамі Захаду апазіцыянер заяўляў пра занепакоенасць лёсам Марыі Калеснікавай, а потым — пра тое, што Лукашэнка нібыта мяняе палітвязняў на запчасткі да самалётаў (юрысты-міжнароднікі сумняюцца).

Па звестках праваабаронцаў “Вясны”, на 7 кастрычніка ў Беларусі налічваецца 1281 палітвязень.