За 14 месяцаў прэзідэнта Малдовы пяты раз часова пазбавілі паўнамоцтваў
За 14 месяцаў прэзідэнта Малдовы пяты раз часова пазбавілі паўнамоцтваў. Ігар Дадон зноў не падпісваў законы, ухваленыя парламентам, інфармуе zdg.md.
Ігару Дадону 43 гады. Ён быў дэпутатам парламента, міністрам эканомікі і гандлю, першым віцэ-прэм'ерам, ачольваў Партыю сацыялістаў. Прэзідэнтам стаў у снежні 2016 года. Раней Канстытуцыйны суд Малдовы чатыры разы (17 кастрычніка 2017 года, 2 і 5 студзеня, 24 верасня 2018-га) часова пазбаўляў Дадона паўнамоцтваў з-за таго, што ён не падпісваў шэраг законаў, ухваленых парламентам (аб прызначэнні міністраў, аб барацьбе з замежнай прапагандай ды іншыя). У выніку паўнамоцтвы прэзідэнта часова атрымліваў спікер парламента, ён падпісваў гэтыя законы, пасля чаго паўнамоцтвы вярталі Ігару Дадону. У парламенце большасць дэпутатаў з'яўляюцца апанентамі прэзідэнта.
10 снежня Канстытуцыйны суд Малдовы часова пазбавіў Ігара Дадона паўнамоцтваў пасля звароту спікера парламента Андрыяна Канду і дэпутата Дэмпартыі Сяргея Сырбу. Напярэдадні прэзідэнт паўторна адмовіўся падпісаць некалькі законаў: новы Кодэкс тэлебачання і радыё, праект будаўніцтва амбасады ЗША на тэрыторыі былога Рэспубліканскага стадыёна, рэформу Дэпартамента войск карабінераў, праект, які прадугледжвае святкаванне Дня Еўропы 9 траўня. Парламент заявіў, што Дадон парушыў Канстытуцыю, таму законы зноў прынялі ў абыход прэзідэнта.
