За кратамі кікбаксёр Аляксей Кудзін перайшоў на беларускую мову
За кратамі кікбаксёр Аляксей Кудзін перайшоў на беларускую мову. Як піша "Наша ніва", спачатку ён адказваў на ліст па-руску, а пасля напісаў па-беларуску. "Адразу ўспомніў дарогу ў свой родны горад Маладзечна, які вельмі люблю і ніколі не кіну", — гэта радок з ліста Кудзіна.
Шматразовы чэмпіён свету па кікбоксінгу і тайскім боксе Аляксей Кудзін быў асуджаны 11 жніўня 2021-га ў Маладзечне на два з паловай гады калоніі агульнага рэжыму. Яго прызналі вінаватым у супраціўленні міліцыянерам падчас разгону акцыі пратэсту ў жніўні мінулага года. Кудзін заявіў у судзе, што насамрэч гэта была самаабарона. Ён прызнаны палітзняволеным.
Кудзін спрабаваў пазбегнуць крымінальнага пераследу і ў канцы 2020-га выехаў у Расію. Але яго аб'явілі ў вышук, затрымалі пад Масквой, а ў ліпені сёлета выдалі ў Беларусь.
