За яйка, кінутае ў машыну ДАІ, ветэрынара асудзілі на два гады "хатняй хіміі"
Суд Першамайскага раёна Мінска асудзіў мінскага ветэрынара Рыгора Чагадаева. Яго прызналі вінаватым паводле артыкула 364 Крымінальнага кодэкса (пагроза гвалту супраць міліцыі): мужчына кінуў яйка на капот машыны ДАІ, піша праваабарончы сайт "Вясна".
Пацярпелымі па справе праходзілі пяць супрацоўнікаў ДАІ: Аляксандр Герасімёнак, Андрэй Якубовіч, Сяргей Батуркевіч, Уладзіслаў Дземянец, Віталь Паслед.
Здарэнне адбылося ў ноч з 10 на 11 жніўня 2020 года. Чагадаеў ехаў на машыне і кінуў у аўтамабіль ДАІ яйка, бо быў абураны падзеямі ў горадзе. Пасля гэтага мужчына ў аранжавай робе кінуў у яго аўтамабіль аранжавы конус, а міліцыянт у бронекамізэльцы стукнуў дубінкай па машыне. Патрабаванняў спыніцца не было, таму кіроўца паехаў далей. Чагадаеў спыніў аўтамабіль толькі на кальцавой, пачуўшы стрэлы.
Некаторыя міліцыянты на судзе патрабавалі кампенсаваць маральную шкоду: маўляў, паспелі напалохацца, пакуль не пабачылі, што за прадмет ляціць у іх бок.
Суддзя Анастасія Кулік прысудзіла Чагадаеву два гады "хатняй хіміі".
