Злачынства стагоддзя: скрасці фургон з пончыкамі і нічога не з'есці — #ІхНоравы

15/12/2023 - 13:35

Пончыкі / pixabay

Сачыць за тым, што адбываецца ў свеце, трэба не толькі, калі Святлана Ціханоўская выязджае на сустрэчу з амерыканскімі кангрэсменамі. Але мы ведаем, што вы занадта занятыя паглынаннем беларускіх навін, таму кожны дзень маніторым сусветныя медыя замест вас.

Преступление века: угнать фургон с пончиками и ничего не съесть — #ИхНравы

Святлана Ціханоўская размаўляе з кангрэсменамі / тэлеграм-канал Святланы Ціханоўскай

І вельмі коратка расказваем пра самыя галоўныя (а часам і пра самыя смешныя) падзеі ў свеце.

“Здаровы сэнс Еўропы”

Ледзь толькі еўрапейскія лідары пачалі перамовы аб членстве Украіны і Малдовы ў ЕС, як прэм'ер Венгрыі Віктар Орбан заявіў, што ён блакуе 50 мільярдаў еўра еўрапейскай дапамогі для Кіева.

Орбан мог і самі перамовы заблакаваць, але не зрабіў гэтага. Хоць потым доўга тлумачыў венгерскаму радыё, маўляў, 8 гадзін змагаўся з партнёрамі па ЕС, але так і не змог пераканаць іх, што Украіна не павінна быць сябрам аб'яднання.

Украіна і суседняя Малдова падалі заяўку на ўступленне ў ЕС пасля таго, як Расія пачала поўнамаштабнае ўварванне ва Украіну ў лютым 2022 года. Ім абодвум нададалі статус кандыдата ў чэрвені мінулага года.

Орбан рашуча супрацьстаіць ідэі аб уступленні Украіны ў ЕС. Паводле яго слоў, вайна, карупцыя і жорсткае абыходжанне з венгерскай меншасцю пазбаўляюць Кіеў права стаць сябрам аб'яднання ў бліжэйшы час.

І хоць перамовы аб сяброўстве Орбан не заблакаваў, ён усё ж такі стаў прычынай дрэнных навін для Кіева і пакінуў Украіну без еўрапейскай дапамогі. І гэта прытым, што ўсе астатнія краіны ЕС вельмі хацелі гэтую дапамогу выдзеліць.

У пачатку наступнага года перамовы аб дапамозе для Украіны адновяцца, і прэм'ер Нідэрландаў Марк Рутэ абнадзейвае: "Яшчэ ёсць час, у бліжэйшыя некалькі тыдняў Украіна не застанецца без грошай".

Орбан лічыць, што "Венгрыя — голас здаровага сэнсу ў Еўропе". Але меркаванне прэзідэнта Украіны Уладзіміра Зяленскага менш камплементарнае. Ён мяркуе, што Уладзімір Пуцін проста наклаў вета на пастанову — праз Орбана.

Вы думалі, што сітуацыя з правамі афганскіх жанчын не можа пагоршаць?

ААН кажа, што ў Афганістане талібы адпраўляюць у турму жанчын, якія перажылі гвалт. І яшчэ заяўляюць, што робяць гэта, каб іх абараніць.

Да таго, як талібы захапілі ўладу, сітуацыя ў краіне таксама была не вельмі добрай, але там было прынамсі 23 дзяржаўныя прытулкі для пацярпелых жанчын. Іх больш няма. Урад Талібану палічыў, што яны непатрэбныя, адзін з прадстаўнікоў талібаў сказаў, што падобныя прытулкі — гэта "заходняя канцэпцыя".

Цяпер у выпадку хатняга гвалту, калі ёсць пагроза жыццю жанчыны, яе будуць адпраўляць да сваякоў-мужчын. А калі такіх няма — у турму. Заходні свет, вядома, у шоку ад такога падыходу.

"Утрыманне жанчын, якія ўжо знаходзяцца ва ўразлівым становішчы, у карным асяроддзі, верагодна, акажа негатыўны ўплыў на іх псіхічнае і фізічнае здароўе", — кажуць у ААН.

Днямі Вольга Гарбунова, якая ў Беларусі доўгі час кіравала прытулкам для жанчын "Радзіслава", расказвала, што і ў Беларусі сітуацыя з хатнім гвалтам толькі пагоршала. І выгнанне многіх актывістаў, якія ў тым ліку займаліся падтрымкай жанчын, не дапамагае справіцца з праблемай.

Сто тысяч долараў за данос

А паліцыя Ганконга абяцае больш за сто тысяч долараў за інфармацыю пра пяцярых актывістаў, якія ўсё яшчэ спадзяюцца вярнуць дэмакратыю.

Іх абвінавачваюць у самых розных злачынствах: ад падбухторвання да сепаратызму і да змовы з замежнымі сіламі. Чацвёра з іх, на думку паліцыі, парушылі Закон аб нацыянальнай бяспецы.

"Яны прадалі сваю краіну і Ганконг і зняважылі ганконгцаў, — сказаў суперінтэндант Дэпартамента нацыянальнай бяспекі Лі Квай-ва. — Міністэрства нацыянальнай бяспекі будзе пераследваць іх да канца".

Мы ні на што не намякаем, але ўпэўненыя, нешта падобнае вы чулі, калі часам дзеля забавы ўключаеце беларускае тэлебачанне.

У адказ на гэта адзін з актывістаў, якіх шукаюць, сказаў: "Калі цябе пераследуе тайная паліцыя Кітая (Ганконга) з узнагародай у адзін мільён долараў — гэта гонар на ўсё жыццё".

Скрасці фургон з пончыкамі і нічога не з'есці

Аўстралійка скрала фургон з 10 тысячамі пончыкаў. І ніводнага не з'ела!

Фургон знік з заправачнай станцыі ў прыгарадзе Сіднэя уранку 29 лістапада. А праз тыдзень паліцыянты знайшлі яго — і тысячы сапсаваных пончыкаў — на аўтастаянцы. Сярод "сагнаных" пончыкаў былі класічныя і калядныя.

У крадзяжы падазраюць 28-гадовую аўстралійку. Мяркуючы па камерах назірання, а 4-й раніцы яна з'явілася на стаянцы, а потым залезла ў фургон з пончыкамі — і з'ехала. Прычым, незразумела, ці была яна наогул у курсе таго, што ў фургоне ляжаць 10 тысяч пончыкаў. Здаецца, ёй проста патрэбны быў транспарт!

Кампанія-вытворца пончыкаў запэўніла кліентаў, што ўжо рупіцца пра тое, каб напячы яшчэ.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.