Адкрыты ліст Вадзіма Пракоп'ева пра сітуацыю з каліноўцам Верамейчыкам

Вадзім Пракоп'еў
Вадзім Пракоп'еў папрасіў Еўрарадыё апублікаваць яго бачанне сітуацыі з экс-каліноўцам Васілём Верамейчыкам, якога В'етнам выдаў Беларусі, а таксама адказаў Дзмітрыю Шчыгельскаму і Дзмітрыю Грамакову. Далей — тэкст Вадзіма Пракоп'ева, яго пазіцыя можа не супадаць з пазіцыяй рэдакцыі, мы публікуем гэта з улікам таго, што ён адказвае на заявы, якія прагучалі ў эфірах Еўрарадыё.
***
Паглядзеў інтэрв'ю Васіля Верамейчыка з мадам Гладкай. Двойчы.
Высновы:
— Яны зробяць усё магчымае, каб ператварыць яго ў Пратасевіча. Пратасевіча для чырвона-зялёных сілавікоў. Любымі сродкамі. Калі не хопіць экспертызы, паклічуць саюзнікаў з Лубянкі.
— Пакуль нічога не атрымалася. Запісвалі безліч гадзін. Задавалі адны і тыя ж пытанні шмат разоў. Шукалі патрэбную інтанацыю. Мантаж. Мантаж. Мантаж.
— У Васіля шкляныя вочы і залішняя жэстыкуляцыя. Дапускаю хімічнае ўздзеянне.
— Гладкая выглядае стомленай пажылой жанчынай. Усё ж такі праца інфармацыйнай абслугай не дадае прыгажосці.
— "Шакавальны" сцэнар уварвання з расстрэлам мірных жыхароў Маларыты зробіць уражанне толькі на праўладных пенсіянерак.
— Яшчэ раз падкрэсленая роля даносаў былога штаба ПКК у адмове Украіны і Літвы.
— Гэта не канец. Васіля працягнуць "адпрацоўваць".
Нагадваю чытачам: Васіль трапіўся ў рукі КДБ у В'етнаме, куды яго занесла ад адчаю. Спачатку яму адмовіла Украіна, за якую ён ваяваў. Потым Літва — паглядзеўшы на Украіну. Затым Грузія. Падрабязнасці перапіскі і галасавыя паведамленні, якія ўсплылі, пацвярджаюць старую гіпотэзу аб тым, што адмову ва Украіне Васіль атрымаў па даносе былога штаба ПКК. Злітыя файлы з размовамі сп. Кабанчука і сп. Манько сведчаць аб практыцы палявання на ведзьмаў — "там кубло такое..." — і барацьбе з непажаданымі любымі сродкамі, у тым ліку з дапамогай "пасла" ў Кіеве, прадстаўніка АПК.
Пакуль Каардынацыйная рада рыхтуецца да слуханняў па кейсе Васіля Верамейчыка, у беларускіх незалежных медыя з'явілася група падтрымкі сп. Кабанчука.
У адказ на маё інтэрв'ю на Еўрарадыё спачатку выступіў сп. Шчыгельскі. Дзмітрый Шчыгельскі скарыстаўся з жалезнай аргументацыі: "Пракоп'еў добра расказвае. Літаратурна. Але ў жыцці яно па-іншаму". Як менавіта "па-іншаму" ў жыцці, Шчыгельскі не патлумачыў. Дзмітрый згадаў, што сварыцца з Украінай дзеля Васіля — тактыка не вельмі перспектыўная. Нам з Украінай трэба супрацоўнічаць.
Прыкладам такога "супрацоўніцтва" на Еўрарадыё выступіў іншы абаронца Кабанчука — сп. Дзмітро Грамакоў. Грамакоў для грунтоўнасці быў у паўвайсковай форме, з дагледжанным тварам і мітуслівымі вачыма.
Гледачам прапаноўвалі паверыць, што перад імі афіцыйная асоба. Супрацоўнік ГУР, не драбней. Грамакоў шмат гаварыў на скупой украінскай мове.
Сутнасць зводзіцца да наступнага:
— Ніякай забароны СБУ не існуе. У вас няма доказаў.
— Пракоп'еў зарабляе палітычныя балы.
— А Сахашчык наогул агентура.
Спытаў у ШІ, хто такі Грамакоў. Вось адказ:
"Дзмітрый Грамакоў — украінскі сацыёлаг, палітолаг і паліттэхнолаг з Дняпра, вядомы сумніўнымі сацыялагічнымі апытаннямі і сувязямі з алігархічнымі палітычнымі сіламі. Ён быў дырэктарам агенцтва "Украінская праектная сістэма" (2009-2014) і займаў пасады ў аналітычных цэнтрах. Таксама яго дзейнасць звязаная з маніпуляцыяй грамадскай думкай праз малапрыкметныя піяр-структуры. У мінулым Грамакоў быў вядомы супрацоўніцтвам з прарасійскімі структурамі. Актыўна ўдзельнічае ў падтрымцы беларускай апазіцыі".
Патэлефанаваў сябрам ва Украіну, паспрабаваў даведацца больш. Вось вынікі:
— Называе сябе сацыёлагам. Фрылансер.
— У ГУР не служыць. У АП не працуе.
— Падзарабляе на разнастайных выбарах.
— Быў падрадчыкам у структур Мядзведчука.
— У 2014 годзе працаваў з беларускімі прапагандыстамі Шпакоўскім і Дзермантам у адным аналітычным цэнтры.
У 2022 годзе Дзмітрый Грамакоў актывізаваўся па беларускай тэме. Знайшоў грошы на дзве вялікія канферэнцыі — у Румыніі і Польшчы, дзе сабраў усю даверлівую беларускую апазіцыю. Усіх запісаў. Зарэгістраваў. Арганізаваў стратэгічныя гульні па сцэнарах змены рэжыму ў Мінску.
У мяне ўзнікае пытанне: ці трэба кабінету Зяленскага або службам Украіны вылучаць бюджэт на канферэнцыі з беларускай апазіцыяй? Упэўнены, што не. Беларускую апазіцыю за суб'ект не ўспрымаюць. У Офіса Зяленскага пагадненне з Мінскам.
Тады хто даў грошы Грамакову? І хто атрымаў дакументы з усімі вынікамі стратэгічных гульняў па змене рэжыму?
Беларуская апазіцыя напачатку вайны доўга не магла паверыць, што яна зусім не цікавая Украіне. Гэта дало поле магчымасцяў для палітычных авантурыстаў — дзяцей лейтэнанта Шміта.
Як тут не ўспомніць класіку? "Французскае прозвішча кухара служыла яму лепшай рэкамендацыяй..."
Апошнія навіны: у цяперашні момант ва Украіне знаходзіцца палонны з РБ. Ён патрабуе, каб урад Лукашэнкі заняўся ягоным лёсам. Гэта рэдкі шанец.
Афіцыйны ліст са зваротам да вайскова-палітычнага кіраўніцтва Украіны знаходзіцца ў працэсе зацвярджэння ў Каардынацыйнай радзе беларускай апазіцыі.
Васілю — сіл і моцных нерваў. Спадзяемся на лепшае.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.