Аляксандр Багдановіч: Беларусі не варта адмаўляцца ад удзелу ў Алімпіядзе
![Аляксандр Багдановіч: Беларусі не варта адмаўляцца ад удзелу ў Алімпіядзе](/sites/default/files/styles/gallery_main/public/2023-08/viasliar-0712.jpg.webp?itok=nnrbcwGz)
Расійскую зборную адхілілі ад зімовай Алімпіяды неабгрунтавана, з палітычных прычынаў. Такое меркаванне выказаў у гутарцы з журналістамі дэпутат Палаты прадстаўнікоў Аляксандр Багдановіч, у мінулым спартовец-вясляр, алімпійскі чэмпіён 2008 года.
На думку Багдановіча, адхіляць ад спаборніцтваў трэба канкрэтных спартоўцаў, якія правініліся, а не ўсю зборную.
Разам з тым ён прапанаваў расійскім спартоўцам выступіць на Алімпядзе ў Пхёнчхане пад сцягам Беларусі.
Самой жа Беларусі не варта адмаўляцца ад удзелу ў Алімпіядзе-2018, лічыць дэпутат. Як вядома з такой прапановай выступіў напярэдадні дэпутат расійскай Дзярждумы Віталь Мілонаў, прапанаваўшы выказаць салідарнасць з Расіяй.
Багдановіч зазначае, што беларускія спартоўцы не датычныя да канфлікту, які ўзнік паміж Міжнародным Алімпійскім камітэтам і Расіяй. Па яго словах, нашым атлетам трэба паказваць на Гульнях свае здольнасці.