Базанаў — пра няўдачы беларускіх клубаў у еўракубках: важны сам удзел
Кіраўнік Беларускай федэрацыі футбола Уладзімір Базанаў мяркуе, што з-за санкцый беларускім клубам "цяжка здабываць вынік у Еўропе". У гэтым сезоне яны праваліліся ўжо на пачатку адбору еўракубкаў. У выніку ў рэйтынгу Беларусь апынулася на апошнім месцы!
Як паведамляе БЕЛТА, Базанаў наракае на "дадатковыя фінансавыя выдаткі на лагістыку і пражыванне" (беларускім клубам можна праводзіць гульні ў еўракубках толькі на нейтральных палях), на "матчы без заўзятараў", на неабходнасць з-за ўсяго гэтага "уносіць карэктывы ў трэніровачны працэс".
"А колькі часу сыходзіць на дарогу? — апраўдваецца спартыўны функцыянер. — Вынік адмоўны, але з улікам усіх складанасцяў, якія ўзніклі, важна, што мы працягваем гуляць у еўракубках".
Атрымліваецца, што галоўнае — не вынік, а проста ўдзел.
