Беларусы за суткі закрылі збор для шахматыста, які выступіў супраць гвалту
![Уладзіслаў Кавалёў](/sites/default/files/styles/gallery_main/public/2023-12/kavalou.png.jpg.webp?itok=qIgKVWEo)
Уладзіслаў Кавалёў
Беларусы за суткі закрылі збор для шахматыста, які выступіў супраць гвалту. Цяпер Уладзіслаў Кавалёў мае сродкі для паездкі на чэмпіянат свету ў Самарканд, заўважыла "Наша Ніва".
Праз сваю грамадзянскую пазіцыю Кавалёў не мае падтрымкі Беларускай федэрацыі шахмат. Таму на чэмпіянат свету па рапідзе і бліцы, што пройдзе ва Узбекістане з 25 па 30 снежня, будзе заяўлены ад Міжнароднай федэрацыі. Усе выдаткі для падрыхтоўкі і ўдзелу ў ЧС Уладзіслаў вымушаны пакрываць самастойна.
Учора была абвешчана сума збору — 1600 долараў (1470 еўра). Гэтая сума пакрывала б выдаткі на падрыхтоўку, размяшчэнне і арганізацыйныя пытанні ў часе ўдзелу ў чэмпіянаце свету. Па стане на раніцу суботы сабрана 1500 еўра, зроблена 38 ахвяраванняў. Але збор працягваецца.
Уладзіслаў Кавалёў — падпісант адкрытага ліста беларускіх спартоўцаў супраць гвалту, а таксама падпісант міжнароднай антываеннай дэкларацыі спартоўцаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.