Як Беларусь "з паветра" зарабляе амаль 200 мільёнаў еўра за год

"Белаэранавігацыя" зарабляе на самалётах, якія пралятаюць ў беларускай паветранай прасторы. За кожны кіламетр бяруць 50 еўрацэнтаў. За суткі пралятае каля 1300 самалётаў. З кожнага выходзіць каля 400 еўра, — піша gorad.by. Пасля нескладаных падлікаў выходзіць каля 500 тысяч еўра за адны суткі. А за год больш за 180 мільёнаў еўра!

 

"Службы, якія вядуць самалёт, яны затрачваюць сродкі. Радыёлакацыя, радыёнавігацыя, сувязь, дыспетчар. Гэта называецца аэранавігацыйныя зборы за пралёт над тэрыторыяй, у дадзеным выпадку, Рэспублікі Беларусь", — распавядаюць Еўрарадыё ў "Белаэранавігацыі".

 

Неба — абмежаваны рэсурс для самалётаў, як і частоты для аператараў сувязі. Таму лагічна, што іх прадаюць на аўкцыёнах, мяркуе незалежны аналітык Сяргей Чалы.

 

Як жа яшчэ можна зарабіць на паветры? Еўрарадыё ўзгадвае, што ў 2013 годзе Беларусь планавала прадаваць квоты на выкіды парніковых газаў...

 

Пакуль рашэнне аб удзеле ў другім этапе Кіёцкага пратакола не прынятае, расказваюць у дэпартаменце па гідраметэаралогіі. Чакалася, што ўсё вырашыцца пасля 18 канферэнцыі ў Досе, але рашэнні, прынятыя там, не зусім адпавядаюць нацыянальным інтарэсам. Таму пакуль вядуцца кансультацыі.

 

"Ад іх будзе залежаць шмат. Ці будзем мы рэкамендаваць ратыфікаваць пагадненне. Усё павінна быць у інтарэсах нашай дзяржавы", — распавядае дырэктар дэпартамента Алег Масюта.

 

Справа ў тым, што Украіна прадала квоты ў першым этапе, прыблізна на мільярд долараў. Але засталіся яшчэ квоты, якія яны хочуць перанесці ў другі этап. Такая ж пазіцыя ў Беларусі. Але шмат хто супраць.

 

 

Таму на сёння квоты мы не прадаём, бо не ратыфікавалі пратакол. А маглі б зарабляць, кажа Сяргей Чалы.

 

 

Для краін постсавецкай прасторы абралі такі час для адліку, калі быў максімальны эканамічны ўздым, і пра экалогію не думалі. Тады выкіды былі максімальнымі, а ў параўнанні з сённяшнім днём значна скараціліся. Таму розніцу можна прадаваць, напрыклад, Германіі, якой прасцей купіць квоты, чым скарачаць вытворчасць.

 

Дарэчы, падобныя квоты, а дакладней экалагічны падатак плаціць дзяржаве, напрыклад, наваполацкі "Нафтан". Але сэнсу ў гэтым амаль няма. Падатак ідзе проста ў бюджэт, а не ў спецыяльны фонд па абароне навакольнага асяроддзя.

 

Еўрарадыё таксама ўзгадвае, як у Мінску спрабавалі прадаваць гарадское паветра ў бляшанках. Але і тут не пайшло...

 

"Надта маленькі абарот. А вытворчасць у такіх малых аб'ёмах вельмі дарагая. Таму прыбытку няма. Калі рабілася гэта, разлічваў на прыбытак, але гэта было на эмоцыях", — распавядае прадпрымальнік Павел Торчык.

 

З пачатку 2011 года прадалося каля тысячы бляшанак з паветрам. Адна каштуе каля 30 тысяч рублёў.