Два сантэхнікі ледзь не спалілі дзевяціпавярховік у Мінску (фота)
Ратавальнікі вынеслі абодвух сантэхнікаў з сутарэння ў непрытомным стане.
12 снежня каля 23.30 сталічныя ратавальнікі атрымалі звесткі пра пажар у сутарэннях дзевяціпавярховага жылога дома на вуліцы Ландэра. На месцы яны пабачылі адкрытае полымя на ўваходзе ў скляпенне.
Як паведамляе прэс-служба МНС, ратавальнікі эвакуявалі з дома 23 чалавек, у тым ліку траіх дзяцей. У службовым памяшканні ў сутарэнні дома ратавальнікі знайшлі двух непрытомных сантэхнікаў ЖРЭА. Мужчыны шпіталізаваныя ў лякарню.
Пажар удалося лакалізаваць за 20 хвілінаў, яшчэ праз паўгадзіны пажар быў ліквідаваны. У выніку пажару адбылося загаранне паперы, кардона і будаўнічага смецця на плошчы 7 кв.м.
Мяркуецца, што пажар узнік ад неасцярожнага абыходжання з агнём пры курэнні.
Фота — mchs.gov.by