Апазіцыянер уцёк з Венесуэлы і працоўныя коцікі ў Японіі — #ІхНоравы

09/09/2024 - 15:17

Міжнародныя навіны / @rubanau_collage

Тайфун Ягі, найбуйнейшы сёлета, у панядзелак разбурыў вялікі мост у В'етнаме. Хоць ён аслабеў, улады папярэдзілі пра новыя катаклізмы.

У той жа час стала вядома, што апазіцыйны кандыдат у прэзідэнты Венесуэлы пакінуў краіну і атрымаў палітычны прытулак у Іспаніі.

Аматары Oasis могуць усцешыцца: гурт не толькі ўз’яднаўся, каб адыграць некалькі канцэртаў, але і выдасць новы альбом!

Пра гэта — і коцікаў — у нашай штодзённай рубрыцы #ІхНоравы.

Былы кандыдат у прэзідэнты Венесуэлы атрымаў палітычны прытулак у Іспаніі

Адзін з лідараў венесуэльскай апазіцыі і былы кандыдат у прэзідэнты Эдмунда Гансалес выехаў з краіны. Ён атрымаў палітычны прытулак у Іспаніі, у амбасадзе якой палітык прабыў некалькі дзён перад вылетам, перадае NPR.

Пра нечаканы ад’езд Гансалеса паведаміла віцэ-прэзідэнтка Венесуэлы Дэлсі Радрыгес. Яна сказала, што ўрад вырашыў даць палітыку бяспечны выезд усяго праз некалькі дзён пасля загаду яго арыштаваць, каб дапамагчы аднавіць “палітычны мір і спакой у краіне”. Нічога не нагадвае?

За гэтыя дні тайфун затапіў аўтамагістралі, паваліў тысячы дрэў і разбурыў ажыўлены мост на поўначы В'етнама. Ягі затапіў і панёс па цячэнні дзясяткі рыбалавецкіх суднаў. У нядзелю ратавальнікі знайшлі 27 чалавек, якія дрэйфавалі ў моры.

Хоць у панядзелак тайфун аслабеў, улады папярэдзілі пра новыя паводкі і апоўзні. Амаль 50 000 чалавек эвакуявалі з прыбярэжных гарадоў В'етнама. Школы былі часова закрытыя ў 12 паўночных правінцыях.

Да таго як абрынуцца на В'етнам, Ягі забраў жыцці 24 чалавек на поўдні Кітая і на Філіпінах. Навукоўцы гавораць, што тайфуны і ўраганы робяцца мацнейшымі, часцейшымі і застаюцца над сушай даўжэй праз змяненне клімату.

Японская IT-кампанія "наняла" катоў

IT-кампанія Qnote у Токіа "наняла" 11 супрацоўнікаў-катоў. У іх абавязкі ўваходзіць быць мілымі, мяўкаць, вуркатаць, драмаць ля акна і дапамагаць сваім чалавечым калегам у працоўны час. Акрамя таго, яны адказваюць за сувязі з грамадскасцю, паляпшаючы імідж кампаніі ў сацсетках.

Першую "штатную" котку Футабу кампанія завяла яшчэ ў 2004 годзе. З таго часу кампанія “наняла” яшчэ 11 катоў. Адзін з іх памёр у 2022 годзе, а Футаба — у канцы жніўня гэтага года ва ўзросце 20 гадоў і 3 месяцаў. У яе гонар зладзілі развітальную вечарынку.

Цяпер у офісе кампаніі ў Токіа акрамя 32 чалавек працуе 10 каціных "супрацоўнікаў", і большасць з іх — поўны працоўны дзень. Кожнаму з іх Qnote нават прызначыў пасады, напрыклад "галоўны клерк", "менеджар", "аўдытар".