Фотафакт: Крэмль паказаў Пуціна пасля васьмі дзён адсутнасці
Увесь гэты час у медыяпрасторы з’яўляліся чуткі пра праблемы са здароўем у расійскага лідара.
Расійскі прэзідэнт Уладзімір Пуцін упершыню з’явіўся на публіцы пасля васьмі дзён адсутнасці. 13 сакавіка ён сустрэўся са старшынёй Вярхоўнага суда Расіі Вячаславам Лебедзевым, пра што і паведаміла прэс-служба Крамля.
На трох фота, далучаных да прэс-рэліза, Пуціна паказваюць або ў профіль, правым бокам, або са спіны.
Прэзідэнт Расіі з 5 сакавіка не з’яўляўся на публіцы. Зрэшты, учора ён паразмаўляў па тэлефоне са сваім армянскім калегам Сержам Саргсянам. Пра гэта паведаміла прэс-служба Крамля, а таксама сайт армянскага прэзідэнта.
Доўгая адсутнасць Пуціна спарадзіла нямала чутак. Блогеры, а таксама некаторыя СМІ выказваюць меркаванне, што ў расійскага лідара праблемы са здароўем.
