"Хапун" у Баранавічах: сярод затрыманых ёсць і тыя, хто вярнуўся з-за мяжы
АМАП затрымлівае чалавека, ілюстрацыйнае фота / ТАСС
У Баранавічах сілавікі прыйшлі да ўдзельнікаў пратэстаў 2020 года. Сярод затрыманых ёсць і тыя, хто на час выязджаў з Беларусі, але вярнуўся ў краіну. Пра гэта сілавікі расказалі ў сваім тэлеграм-канале.
Пры ператрусах была "выяўленая забаронка", кажуць сілавікі. Яны не ўдакладняюць, пра што гаворка. На апублікаваным відэа гавораць чатыры чалавекі. Адзін з іх — індывідуальны прадпрымальнік. Ён, з яго слоў, быў "затрыманы супрацоўнікамі міліцыі за падзеі, звязаныя з 2020-м годам". Яшчэ адзін мужчына кажа, што "падышоў да агароджы, за якой стаяў АМАП", але дзе і калі гэта адбывалася, з нарэзкі яго слоў незразумела. Трэці чалавек кажа, што "крычалі непрыстойныя лозунгі ў дачыненні да супрацоўнікаў АМАПу".
Колькі ўсяго чалавек было затрымана падчас гэтай аблавы, сілавікі не ўдакладнілі.
