Кіраўнік Starbucks будзе лётаць на працу самалётам. Экаактывісты збянтэжаныя

Нядаўна прызначаны кіраўнік Starbucks Браян Нікал сутыкнуўся са шквалам крытыкі, калі выявілася, што ён будзе лётаць на працу карпаратыўным самалётам.

Нікал прыступіць да працы ў верасні. У Starbucks дзейнічае палітыка, пры якой супрацоўнікі павінныя знаходзіцца ў офісе не менш за тры дні на тыдзень.

Новы кіраўнік жыве ў каліфарнійскім горадзе Ньюпарт-Біч, а штаб-кватэра кампаніі знаходзіцца ў Сіэтле. І ў прапанове пра працаўладкаванне яму гарантаваны карпаратыўны самалёт для паездак паміж офісам і домам.

Карыстальнікі сацсеткі Х заўважылі, што гэта не вельмі адпавядае публічнай пазіцыі кампаніі па пытаннях экалогіі. Самалёты выкідваюць у атмасферу велізарную колькасць вуглякіслага газу і вадзяной пары, аксіду азоту і сажы — не кажучы пра шумавое забруджанне.

"Гэта цудоўна... цудоўныя ўмовы для талентаў. Але спадзяемся, што мы не ўбачым занадта шмат новай рэкламы ад @starbucks, звязанай з "устойлівым развіццём" і "экалогіяй"?" — іранізуе адзін з карыстальнікаў X.

"Не будзьце занадта строгія да той афіцыянткі, якая дала вам пластыкавую трубачку", — напісаў іншы.