Латвія плануе аднавіць узмоцнены рэжым аховы мяжы з Беларуссю
Латвійская мяжа / LETA
Міністэрства ўнутраных спраў Латвіі прапануе аднавіць узмоцнены рэжым аховы мяжы з Беларуссю. Падставай стала новае абвастрэнне сітуацыі з нелегальнымі мігрантамі. Пра гэта паведамляе Delfi. У рэдакцыю трапіў праект распараджэння МУС.
Агенцтва адзначае, што зімой паток мігрантаў, якія спрабуюць незаконна трапіць з Беларусі ў Латвію, скараціўся, таму ўзмоцнены памежны рэжым не падаўжалі. Тэрмін яго дзеяння завяршыўся 10 лютага. Аднак цяпер, адзначаюць у латвійскай памежнай ахове, колькасць спробаў пранікнуць на тэрыторыю краіны зноў расце.
Плануецца, што ўзмоцнены рэжым аховы мяжы будзе дзейнічаць з 13 сакавіка да 12 верасня 2024 года. Ён мяркуе, што памежнікі атрымліваюць узмацненне з боку паліцыі і арміі.
