Лазавік: Назіральнік павінен бачыць, як падлічваюцца бюлетэні (відэа)

Увечары 26 ліпеня сакратар Цэнтрвыбаркаму Мікалай Лазавік у інтэрв'ю праграме "Контуры" тэлеканала АНТ распавёў пр ўдзел назіральнікаў у выбарчай кампаніі і іх правы.

Найперш Лазавік запэўніў, што "калі на нейкім выбарчым участку назіральнікаў не падпускаюць да падліку галасоў, то гэта не сістэма".

"Нават адмыслова ўнеслі папраўку ў закон, што назіральнік павінен назіраць падлік галасоў ва ўмовах, якія забяспечваюць агляднасць падліку галасоў. Не проста павінен здалёк глядзець, а павінен бачыць, як падлічваюцца бюлетэні", — заявіў чыноўнік. Па яго словах, калі выбарчая камісія не будзе даваць назіральніку такога права, то яна парушыць закон і пра гэта трэба сігналізаваць.

Лазавік адзначыў, што мясцовых назіральнікаў на прэзідэнцкіх выбарах бывае 30-40 тысяч і яны актыўна працуюць. У ліку міжнародных назіральнікаў будзе, напрыклад, група АБСЕ.