Лукашэнка нечакана вырашыў выказацца пра індывідуальных прадпрымальнікаў

14 студзеня на нарадзе па ахове дзяржаўнай мяжы Аляксандр Лукашэнка нечакана вырашыў выказацца пра індывідуальных прадпрымальнікаў.

Кіраўнік Беларусі заявіў, што іпэшнікі павінны зразумець: сертыфікацыя прадукцыі — гэта толькі першы крок. Каментуючы сітуацыю з ІП, Лукашэнка патлумачыў: "З 1 студзеня скончыліся іх мядовыя гады, і трэба працаваць у роўных умовах, па адпаведных дакументах".

"Ім трэба разумець, што сертыфікацыя прадукцыі, на якую мы пайшлі, — гэта першы крок. Ёсць тавар — усе суправаджальныя дакументы павінны быць. Мы павінны празрыста гандляваць, і хопіць вакол гэтага нейкія падкопы ладзіць", — перадае БЕЛТА словы кіраўніка дзяржавы.

Лукашэнка нагадаў, што летась ён сустракаўся з індывідуальнымі прадпрымальнікамі, якія гандлююць таварамі лёгкай прамысловасці, і тады ім далі адтэрміноўку да 1 студзеня 2016 года. Беларускі кіраўнік выказаў здзіўленне, што зараз яго падштурхоўваюць да нейкіх новых рашэнняў.

Як вядома, з 1 студзеня ІП у Беларусі не працуюць, бо тавары лёгкай прамысловасці яны павінны прадаваць з сертыфікатамі Мытнага саюза.