Лукашэнка: пасля падзей ва Украіне мы ўбачылі, што не трэба мадэрнізаваць войска
Беларускія ўлады адмовіліся ад ідэі праводзіць мадэрнізацыю войска. На такое рашэнне паўплывала вайна ва Украіне. Пра гэта заявіў Аляксандр Лукашэнка 26 траўня падчас нарады з кіраўніцтвам Міністэрства абароны.
Па яго словах, да пачатку расійскай вайны ва Украіне беларускае кіраўніцтва па-іншаму ацэньвала далейшае развіццё Узброеных сілаў.
"Прайшло тры месяцы супрацьстаяння Украіны і Расіі, гэтай ваеннай аперацыі, мы ўбачылі, што нам не трэба праводзіць такую мадэрнізацыю, як мы тады замахнуліся: вельмі дарагую і для нашай Рэспублікі, для нашых умоў наогул непрымальную", — цытуе БЕЛТА словы Лукашэнкі.
Беларускае войска не прымала актыўнага ўдзелу ў вайне супраць Украіны. Аднак з тэрыторыі Беларусі адбываліся атакі на Украіну, і ў беларускіх шпіталях лекаваліся параненыя расійскія вайскоўцы.
