Магчыма, вы прымаеце свае лекі няправільна. Праверце сябе

21/02/2024 - 14:07

Якія памылкі дапускаюцца часцей за ўсё? / Unsplash

Лекі працуюць, калі правільна іх прымаць. А гэта праблема. Напрыклад, адзін сістэматычны агляд дадзеных аб 13 тысячах пацыентаў з гіпертаніяй з 15 краін свету паказаў, што больш за палову з іх не прымалі прэпараты пастаянна. А гэта ўжо ставіць пад пытанне ўсю эфектыўнасць лячэння. І такая праблема не толькі з падобнымі лекамі.

The Washington Post разам з доктарам Трышай Пасрычы нагадалі пра самыя частыя памылкі падчас прыёму лекаў. Шмат якія могуць прывесці не толькі да зніжэння эфектыўнасці лячэння, але і патэнцыйна небяспечных пабочных эфектаў. Вы праўда п'яце таблеткі так, як трэба? Праверце сябе!

Вы п'яце лекі, якія вам не патрэбныя

Адно амерыканскае даследаванне паказала, што 65% пажылых людзей могуць прымаць прэпараты, якія ім не патрэбныя, і гэтым павышаць сабе рызыку пабочных эфектаў. Гэта праблема не толькі пажылых, але і самой рызыкі.

Нездарма ў кожнай інструкцыі-ўкладцы да лекаў раяць кансультавацца ў лекарам. Не ўпэўненыя, ці патрэбны вам прэпарат? Спытайце доктара, не займайцеся самалячэннем. А калі вам нешта выпісалі працяглы час таму — лепш перыядычна удакладняйце, ці патрэбна працягваць прыём лекаў.

Вы п'яце больш таблетак, чым трэба

Адна таблетка з камбінацыяй лекаў можа быць больш эфектыўнай, чым некалькі "меншых", нават калі ў суме ў іх аднолькавыя дазіроўкі. Гэта паказала даследаванне на пацыентах з гіпертаніяй. І справа не ў самым дыягназе: проста людзі з большай верагоднасцю не будуць прапускаць і будуць спраўна прымаць адну порцыю, чым некалькі.

Таму часам варта спытаць лекара, ці ёсць варыянты камбінавання, каб зменшыць колькасць і частату прыёму таблетак.

Вы прымаеце лекі ў любы час

Важна захоўваць цыклічнасць прыёму лекаў. Калі раніцай і вечарам, то менавіта раніцай і вечарам. А калі нешта трэба прымаць тройчы на дзень, то менавіта так, а не, напрыклад, дзве дозы раніцай і адну ўвечары.

Вы прымаеце лекі два разы на дзень? Дадаць новыя лекі, якія вам трэба будзе прымаць тры разы на дзень, складаней, чым дадаць яшчэ адну таблетку да вашага цяперашняга рэжыму. Вядома, гэта не заўсёды магчыма, але ў многіх выпадках ваш лекар можа разгледзець альтэрнатывы.

Вы прымаеце прэпараты ад пякоткі ў неадпаведны час

Лекі ад пякоткі з групы інгібітараў пратоннай помпы (не палохайцеся гэтых слоў), напрыклад, той жа амепразол, трэба піць за паўгадзіны да ежы. Калі вы вып'еце капсулу з надзеяй пазбавіцца ад непрыемных адчуванняў ўжо пасля ежы... яна можа і не падзейнічаць.

Тое ж самае тычыцца і прыёму амепразолу перад сном. Пры гэткім прыёме ён не дапаможа.

Вы няправільна выкарыстоўваеце інгалятары

Як кажа доктар Пасрычы, амаль 9 з 10 пацыентаў, якія выкарыстоўваюць інгалятары пры астме або хранічнай абструктыўнай хваробе лёгкіх (ХАХЛ), выкарыстоўваюць іх няправільна. Напрыклад, не затрымліваюць дыханне на дастаткова доўгі час або націскаюць на балон не да канца. Лепш паказаць лекару, як вы яго выкарыстоўваеце, каб медык мог выправіць, калі вы робіце гэта не зусім карэктна.