Магілёўцы ў 2010 годзе будуць ствараць па 2 новыя прадпрыемствы на раён

На паседжанні магілёўскага аблвыканкама кіраўнік вобласці Пётр Руднік раскрыў планы сацыяльна-эканамічнага развіцця Магілёўшчыны на 2010 год. Галоўным пунктам у спісе стаіць павышэнне ўзроўня жыцця: мяркуецца, што напрыканцы 2010 года кожны магілёвец будзе зарабляць 500 долараў у месяц. Гэта на 70% вышэй за цяперашні сярэдні заробак, паводле звестак упраўлення статыстыкі.

Плануецца таксама адчыніць 21800 новых працоўных месцаў, стварыўшы мінімум па два прадпрыемствы ў кожным раёне вобласці.

Увогуле бюджэт вобласці ў 2010 будзе “сацыяльным”, бо 57% ад яго аб’ёму (2,7 трлн рублёў) пойдзе менавіта на сацыяльныя патрэбы.