Макрон расказаў, як Пуцін тлумачыў "павелічэнне ваеннай прысутнасці" ў Беларусі
8 лютага на брыфінгу ў Кіеве пасля сустрэчы з украінскім прэзідэнтам Уладзімірам Зяленскім прэзідэнт Францыі Эмануэль Макрон згадаў Беларусь. Паводле яго слоў, "павелічэнне ваеннай прысутнасці" РФ у нашай краіне ("базы расійскага кантынгенту, манеўры") Уладзімір Пуцін апраўдвае "сітуацыяй ціску і напружання". Дзіўна, што не сумеснымі вучэннямі.
Макрон сустракаўся з Пуціным 7 лютага ў Маскве. Прэзідэнт Францыі ўзняў пытанне пра новы праект Канстытуцыі РБ і згадаў пра словы Аляксандра Лукашэнкі наконт размяшчэння на тэрыторыі Беларусі расійскай ядзернай зброі. Прэзідэнт Расіі запэўніў яго, што ядзерную зброю перакідваць у нашу краіну не збіраюцца.
