МАРГ абвінаваціла Мінздароўя ў "дыскрымінацыйных умовах"
Аптэка / 1prof.by
Міністэрства антыманапольнага рэгулявання і гандлю вынесла папярэджанне Міністэрству здароўя. Нагодай сталі запланаваныя змены ў продажы лекаў па рэцэптах у невялікіх прыватных аптэках.
Як планавала Мінздароўя, ужо з 1 чэрвеня невялікую аптэку (пятай катэгорыі) юрасоба ці індывідуальны прадпрымальнік змогуць адчыняць толькі тады, калі ў адміністрацыйным цэнтры дадзенай тэрытарыяльнай адзінкі ўжо дзейнічае аптэка першай ці другой катэгорыі. Пры гэтым Мінздароўя забараніла адпускаць лекі па рэцэптах у аптэках пятай катэгорыі.
У МАРГ назвалі гэтыя нормы "дыскрымінацыйнымі ўмовамі". Ведамства патрабуе да 30 траўня выключыць гэты пункт з пастановы. Гэта азначае, што невялікія аптэкі па-ранейшаму змогуць прадаваць лекі па рэцэптах.
Цяпер у Беларусі працуе каля 3600 аптэк. Усе яны дзеляцца на пяць катэгорый. Большасць камерцыйных аптэк трапляюць у пятую катэгорыю — ім і хацелі забараніць прадаваць лекі па рэцэптах.
