Мітрапаліт Павел: Сёння здзекуюцца з Мікалая ІІ, а заўтра будуць з Леніна
Кіраўнік Беларускай праваслаўнай царквы мітрапаліт Павел выступіў у абарону Уладзіміра Леніна. Нечаканы пасаж прагучаў ў праграме "Гутаркі з уладыкам Паўлам" на тэлеканале "Эхо ТВ", якая выйшла ў эфір 26 жніўня.
Беларускі мітрапаліт раскрытыкаваў фільм "Мацільда", прысвечаны каханню паміж Мікалаем ІІ і балярынай Мацільдай Кшасінскай. Стужка стала скандальнай яшчэ да сваёй прэм'еры.
Крытыкуючы фільм і абараняючы апошняга расійскага імператара, мітрапаліт неспадзявана выступіў у абарону і правадыра сусветнага пралетарыяту.
"Сёння паздзекваліся з Мікалая Другога, імператара, заўтра будуць паказваць, чым займаўся Уладзімір Ільіч Ленін у шалашы, чым ён займаўся ў Парыжы… Паслязаўтра іншага кіраўніка будуць паласкаць і ганьбіць… Гэта непрыемна", — заяўляе кіраўнік Беларускай праваслаўнай царквы (на відэа з 6-й хвіліны).
