На бягучым тыдні ў Беларусі чакаецца цёплае, але дажджлівае надвор'е
На бягучым тыдні ў Беларусі чакаецца цёплае, але дажджлівае надвор'е. Пра гэта БЕЛТА паведаміла галоўны сіноптык Рэспубліканскага цэнтра па гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.
Уначы ў аўторак, 3 траўня, пераважна на паўночным захадзе прагназуюцца кароткачасовыя дажджы, месцамі — навальніцы. Тэмпература паветра ў начныя гадзіны складзе 4-10 градусаў са знакам плюс, у дзённыя — 13-19 цяпла (у Гомельскай вобласці — да 21).
У сераду, 4 траўня, кароткачасовыя дажджы і навальніцы магчымыя толькі месцамі. Уначы — 4-11 цяпла, удзень — ад 15 да 21 градуса вышэй за нуль (на Гомельшчыне — да 23 цяпла). У чацвер, 5 траўня, таксама месцамі прагназуюцца ападкі: дажджы і навальніцы. У начныя гадзіны будзе 3-19 градусаў цяпла, у дзённыя гадзіны — 14-21 градус са знакам плюс.
У выхадныя дні (7-10 траўня) на большай частцы Беларусі будзе пераважна без ападкаў, толькі па поўдні кароткачасовыя дажджы, навальніцы. Тэмпература паветра ўначы — плюс 4-11, удзень — плюс 16-23, дадае БелаПАН.
