Нацпаліцыя Украіны: ёсць інфармацыя пра магчымых замоўцаў забойства Шарамета

З інфармацыі Нацпаліцыі вынікае, што гаворка ідзе пра аўдыёзапіс, які з'явіўся ў інтэрнэце і на якім невядомыя абмяркоўваюць забойства беларускага журналіста (адзін з варыянтаў, які абмяркоўваецца, — падрыў). Сцвярджаецца, што ён быў зроблены 11 красавіка 2012 года ў кабінеце тагчаснага старшыні КДБ Беларусі Вадзіма Зайцава. Выданне EUObserver кансультавалася з экспертам, які заявіў, што ў цэлым няма відавочных слядоў аўдыяманіпуляцый. Нацыянальная паліцыя Украіны паведамляе, што атрымала дазвол на правядзенне следчых дзеянняў у адной з еўрапейскіх краін.

Як вядома, крымінальная справа супраць выканаўцаў забойства Паўла Шарамета ва Украіне ўжо перададзеная ў суд, а справа супраць замоўцаў злачынства вылучаная ў асобную вытворчасць (яны дагэтуль неназваныя).

Павел Шарамет — вядомы беларускі журналіст, які вымушаны быў з'ехаць у Расію, а пасля пераехаў ва Украіну. Ён вядомы сваімі расследаваннямі знікненняў у Беларусі апазіцыйных палітыкаў, аператара Змітра Завадскага. Ён стварыў сайт "Беларускі партызан".