Пантонны мост, узведзены расійскімі вайскоўцамі на Прыпяці ў Беларусі, знік
Пантонны мост, узведзены расійскімі вайскоўцамі на Прыпяці ў Беларусі, знік. Пра гэта паведамляе CNN са спасылкай на свае крыніцы і здымкі, зробленыя са спадарожніка.
Мост днямі з'явіўся ў 7 кіламетрах ад мяжы Украіны ў Чарнобыльскай зоне адчужэння. Там было шмат тэхнікі. Узнікла версія, што пантонны мост расіяне могуць выкарыстаць для перакідання вайскоўцаў на тэрыторыю Украіны праз зону ЧАЭС. У Мінабароны Беларусі ўсё тлумачылі вучэннямі.
Эксперты мяркуюць, што мост сапраўды выкарысталі падчас вучэнняў і дэмантавалі. Праўда, дапускаецца і тое, што тэхніку ўжо перакінулі на іншы бераг і патрэбы ў мосце няма.
