Польскі Сенат патрабуе вызваліць Казуліна

“Сенат Польшчы патрабуе вызвалення беларускага апазыцыянера і кандыдыта ў прэзідэнты на выбарах 2006 году Аляксандра Казуліна”.

(Стэфан Несялоўскі) “Само прыняццё рэзалюцыі з’яўляецца сігналам маральным, што вельмі істотна. Таксама гэта сігнал палітычны: для спадара Лукашэнкі зараз вельмі істотныя добрыя стасункі з Еўрасаюзам ды Польшчай, і каб гэта асягнуць, найлягчэйшым і найбольш пераканаўчым жэстам беларускай улады было б вызваленне Казуліна і ўсіх палітычных вязняў.

Менавіта таму мы мяркуем, што гэтая рэзалюцыя можа мець рэальныя наступствы”.

Стэфан Несялоўскі зазначыў, што рэзалюцыя — гэта толькі пачатак барацьбы за беларускіх палітычных вязняў. Галоўная мэта сенатараў — узняць гэтае пытанне на Савеце Еўропы. На паседжанні Сенату прысутнічала таксама Ірына Казуліна, жонка палітвязня.

Пад будынкам варшаўскага Сенату сабралася група беларускіх палітычных уцекачоў з бела-чырвона-белымі сцягамі ды плакатамі з інфармацыяй пра Казуліна, які ужо 333 дні знаходзіцца за кратамі:

“У знак удзячнасці мы наладзілі пікет. Каб падзякаваць польскім сенатарам за тыя турботы, якія яны праяўляюць, каб усталяваць дэмакратыю ў Беларусі”.

У падтрымку Аляксандра Казуліна была створана старонка www.swabodukazulinu.pl , дзе можна атрымыць падрабязную інфармацыю ды даслаць ліст Лукашэнку з патрабаваннем вызваліць Казуліна. Такіх лістоў выслана ўжо больш за 300. Стваральнікі старонкі — варшаўская ініцыятыва “Вольная Беларусь” .