Пушкін падрыхтаваў апошняе слова на 23 старонкі. Праз закрыты суд яго не пачулі

Апошняе слова мастака Алеся Пушкіна, якое ён падрыхтаваў для суда, заняло 23 старонкі. Але суд над Пушкіным амаль адразу зрабілі закрытым, і грамадскасць не змагла яго пачуць, пішуць праваабаронцы "Вясны".

Вядома, што на судзе Алесь быў у белым камбінезоне з надпісам "Белрэстаўрацыя". Менавіта ў ім яго і затрымалі 30 сакавіка 2021 года ў вёсцы Жылічы Магілёўскай вобласці, дзе Пушкін працаваў на рэстаўрацыі палаца Булгакаў.

За тыя месяцы, што ішоў суд, Алеся адпраўлялі ў карцар за “непрыстойныя паводзіны” на паседжанні. Тады ў карцары мастак правёў 15 сутак.

Раней лічылася, што падставай для ўзбуджэння супраць Пушкіна крымінальнай справы стала размяшчэнне партрэта беларускага антысавецкага партызана Яўгена Жыхара на выставе ў гродзенскім "Цэнтры гарадскога жыцця".

Цяпер праваабаронцы даведаліся, што ў затрымання была яшчэ адна падстава. Пушкіна абвінавацілі ў “здзеке з дзяржаўных сімвалаў”. Гаворка ідзе пра перфоманс мастака ў Кіеве, які адбыўся незадоўга да затрымання.

На выставе беларускага пратэснага мастацтва "Кожны дзень" Алесь паўтарыў свой вядомы перформанс "Гной для прэзідэнта", але ў абноўленым фармаце. Замест надпісу "За 5-гадовую плённую працу" ён разліў чырвоную фарбу, якая сімвалізавала кроў. Пасля гэтага перфоманса Пушкін вярнуўся дадому.