Мытніка Скубілава, абвінавачанага ў "здрадзе дзяржаве", асудзілі на 9 гадоў
Дзмітрый Скубілаў / АНТ
Мытніка Дзмітрыя Скубілава на закрытым судзе асудзілі на 9 гадоў пазбаўлення волі. Таксама яму прысудзілі штраф у 500 базавых велічыняў (20 тысяч рублёў на момант вынясення прысуду).
Суд над Скубілавым адбыўся 9 снежня 2024 года. Мужчыну абвінавацілі ў здрадзе дзяржаве (частка 1 артыкулу 356 КК). Канкрэтны прысуд быў невядомы, яго назвалі ў прапагандысцкім фільме дзяржаўнага тэлеканала аНТ.
Са стужкі стала вядома, што Скубілаў нарадзіўся ў 1975 годзе ў Астравецкім раёне. Паведамлялася, што ён доўгі час працаваў на Ашмянскай мытні, афармляў перамяшчэнне трапспарту і грузаў.
Паводле версіі рэжыму Лукашэнкі, Скубілава завербавалі літоўскія спецслужбы. У мужчыны нібыта быў літоўскі ДНЖ, а яго сям'я жыла ў Вільні, куды ён і ездзіў.
