Рабочыя ў Бабруйску спынілі галадоўку, іх патрабаванні не выканалі

Група звольненых рабочых Бабруйскага завода трактарных дэталяў і агрэгатаў, сябраў Свабоднага прафсаюза Беларускага спыніла галадоўку. Яны патрабавалі аднаўлення іх на працы, аднак гэтага не дамагліся.

Мікалай Жыбуль, Алег Шаўчэнка, Аляксандр Варанкін і Аляксандр Грамыка з перапынкам галадалі з 5 лістапада. Іх двойчы выводзілі з будынка мясцовага гарвыканкама, аднойчы ў міліцыі папярэдзілі пра магчымую адказнасць за несанкцыянаваную акцыю пратэсту.

"Галадоўку спынілі, таму што няма сэнсу", — цытуе словы Мікалая Жыбуля БелаПАН.

14 лістапада ўдзельнікаў галадоўкі выклікалі позвамі ў міліцыю. На рабочых склалі пратаколы, іх цяпер чакае суд. Галадоўнікі не згодныя з тым, што іх абвінавачваюць у правядзенні несанкцыянаванай акцыі.

Фота — Fotolia