Расія нанесла чарговы ўдар па энергетычнай інфраструктуры Украіны
Ліквідацыя наступстваў масіраванага расійскага ўдару / t.me/dsns_telegram/
Расія нанесла чарговы масіраваны ўдар па энергетычнай інфраструктуры Украіны. Украінскі прэзідэнт Уладзімір Зяленскі паведаміў, што РФ выкарыстала больш за 40 ракет і каля 40 ударных дронаў. Толькі частку з іх удалося збіць. Удар быў нанесены па аб'ектах крытычнай інфраструктуры ў Харкаўскай, Кіеўскай, Запарожскай, Адэскай і Львоўскай абласцях. "Укрэнерга" паведаміла пра пашкоджаныя падстанцыі і аб'екты генерацыі (цалкам знішчана Трыпольская ЦЭС). Ідзе ліквідацыя наступстваў. У Харкаве ўведзены графік аварыйных адключэнняў электрычнасці.
"Крытычнай з'яўляецца патрэба Украіны ў СПА [супрацьпаветранай абароне], — піша Зяленскі. — Менавіта тут, менавіта цяпер, менавіта нашай здольнасцю пераадолець расійскі тэрор свет можа даказаць, што ўсе аднолькава ўспрымаюць тэрор як злачынства".
