Арганізатара акцыі салідарнасці з палітвязнямі папярэдзіла Генпракуратура
Каардынатару грамадзянскай кампаніі “Еўрапейская Беларусь” Максіму Вінярскаму нагадалі пра недапушчальнасць парушэння закона аб масавых мерапрыемствах.
Генпракуратура вызначыла, што менавіта Вінярскі распаўсюджвае ў інтэрнэце матэрыялы, якія ўтрымліваюць заклік прыйсці на акцыю 24 кастрычніка. Яе маюць правесці на Кастрычніцкай плошчы ў Мінску і на цэнтральных плошчах іншых беларускіх гарадоў. Між тым заявак на правядзенне такога мерапрыемства не паступала, паведамілі БелаПАН у Генпракуратуры.
У сувязі з гэтым Максіму Вінярскаму накіравалі афіцыйнае папярэджанне. Адначасова яму паведамілі пра магчымасць адказнасці за правядзенне несанкцыянаванага мерапрыемства.
