Кіраўнік Драгічыншчыны набывае машыну за 47 тысяч долараў
Яшчэ адзін беларускі чыноўнік перасядзе на нятаннае службовае аўто.
Драгічынскі райвыканкам вырашыў абнавіць свой парк. “Для службовых паездак” кіраўніцтву раёна патрэбнае прадстаўнічае аўто за $47 тысяч. Чыноўнікі хочуць набыць аўтамабіль Hyundai Santa Fe Comfort 4WD трэцяга пакалення ці аналаг. Пачатковы кошт — 400 мільёнаў рублёў ($47 тысяч). Крыніца фінансавання — раённы бюджэт.
Адметна, што старшыня райвыканкама Юрый Дзядзюк на сваёй пасадзе працуе крыху больш за месяц. Ягонага папярэдніка Васіля Хваціка перавялі ў Баранавіцкі раён, адзначае “Наша Ніва”.
Такім чынам, кіраўнік Драгічынскага раёну можа займець сабе адно з самых дарагіх службовых аўто сярод чыноўнікаў яго рангу. Два гады таму аўтамабіль Mitsubishi Outlander, які каштуе 29-35 тысяч долараў, набылі для старшыні Навагрудскага райвыканкаму. Нятаннымі маркамі аўтамабіляў могуць пахваліцца і аўтапаркі шэрагу іншых райвыканкамаў.
Старшыня Ельскага райвыканкаму Леанід Пісанік ездзіць пакуль на Nissan. У выканкаме кажуць, што “машына літаральна развальваецца”, таму тэрмінова патрэбна новая. Пажадана гэта будзе Touareg V6 TDI Tiptronic. Цана ў 600 мільёнаў рублёў (каля 70 тысяч долараў) чыноўнікаў не бянтэжыць.
