"Людзі на балоце" паказалі "аўдыёфільм" пра антыбальшавіцкае паўстанне
На апошнім "Жывым Тузіне" песні зусім яшчэ маладога гурта публіка спявала хорам.
"Жывы Тузін" працягвае адкрываць новыя імёны беларускамоўнай альтэрнатыўнай сцэны. Не без уплыву праекта на нашай сцэне з'явіліся Паліна Рэспубліка, HandmadЕ і іншыя выканаўцы. Але, па-шчырасці, самы цікавы з іх калектыў быў прадстаўлены надоечы ў кафе Loft. Гурт прехаў з Гродна, называецца ён "Людзі на балоце". Яго песні здзіўляюць і тэкстамі, і музыкай, і энергетыкай. Нават Аляксандр Памідораў, які вееельмі любіць пакрытыкаваць усіх і ўсё, нечакана называе творчасць гурта "музыкай па яго душы". Менавіта такіх песень, на думку музыкі і шоў-мэна, не хапае на нашай сцэне.
"Няма ў нас здаровай анархічнасці, калі ёсць сваё разуменне і адчуванне свайго, — тлумачыць Саша, — І мне здаецца, іх песні менавіта такія. Але гэта ж толькі першыя спробы. Гэты гурт можа дасягнуць нармальнай папулярнасці і не толькі ў нас, бо гэтыя песні заўсёды да стала, пры стале, яны для кампаніі, для любой сітуацыі".
Праўда, музыка адразу паправіўся, што пакуль яшчэ "Людзі на балоце" сыраватыя: ім не хапае смеласці ў выкананні. Усё мусіць быць больш свабодна, тым больш, самі песні на гэта падштурхоўваюць сваёй унутранай свабодай. Дарэчы, на канцэрце Pomidor/OFF нечакана выступіў у ролі разаграваючага, а не хэдлайнера, але прысутных гэта не здзівіла. Наадварот, людзі разварушыліся і спявалі з гарадзенцамі разам, так што можна смела заяўляць, што ў зусім яшчэ маладога гурта ўжо ёсць некалькі соцень адданых прыхільнікаў.
"Яны прыдумалі вельмі цікавы праект і занялі абсалютную нішу ў беларускай музыцы таму, што яны звярнуліся да тэмы, да якой фактычна ніхто да іх не звяртаўся, — амаль паўтарае словы Памідорава рэдактар парталу "Тузін гітоў" Сяргей Будкін. — Тое, што яны прапануюць, можна лічыць калі не сапраўдным мастацтвам, бо гэта занадта пафасна, то поглядам разумных людзей, на тое, што адбылося калісьці. А гэтага пераасэнсавання як раз у нашы часы не стае".
Дэбютны дыск "Людзей на балоце" цалкам прысвечаны тэматыцы антыбальшавіцкга паўстання ў Беларусі. Але ён не ўтрымлівае ніякіх лозунгаў а-ля "бальшавікі — казлы". Гэта, хутчэй, такі адукацыйны гістарычны нарыс ці, як мяркуе Сяргей Будкін, аўдыёмастацкі фільм.
"Для мяне ўвогуле, як гісторыка па адукацыі, было заўсёды цікава чаму гэтая тэматыка ніколі не ўсплывала ў рок-асяроддзі, — распавядае лідар гурта Алесь Дзянісаў. — Мяне заўсёды цікавіла тэматыка грамадзянскай вайны. Вядома, я глядзеў камуністычныя, бальшавіцкія фільмы. Але калі ты развіваешся і пачынаеш цікавіцца гісторыяй сваёй краіны, то разумееш, што бальшавіцкая рамантыка — гэта ілжывая рамантыка. Бо існавала іншая гісторыя, існавалі іншыя героі, існавалі іншыя паўстанні, якія былі таксама не менш рамантычныя".
Усе песні аднайменнага дэбютніка “Людзей на балоце” былі напісаныя Алесем яшчэ ў часы існавання гурта "Кальян", якім ён таксама руліў. Але на наступным дыску Дзянісаў выступіць толькі кампазітарам. У яго ўвойдуць лірычныя песні на вершы паэтаў Дануты Бічэль-Загнетевай, Андрэя Пяткевіча і Марыі Базылюк-Саснюк. А вось трэці дыск, не выключае Алесь, магчыма, зноў верне каманду да антыбальшавіцкай тэматыкі. Тым больш, што матэрыял для яго таксама збіраецца.
