Міліцыянты Паўлу Вінаградаву: збірайся, у цябе сёння суд
Аднаго з кіраўнікоў моладзевага крыла грамадзянскай кампаніі “Гавары праўду” “Zмена” ў чарговы раз затрымалі. Суд сёння ў судзе Маскоўскага раёна.
Вось што распавяла Еўрарадыё жонка Паўла Вінаградава Святлана:
120907 Vinahradau zatrymannie.mp3
“У 7.03 прыйшлі. Утраіх. Прозвішча аднаго ведаю — Давідзюк. Ён раней ужо Пашу затрымліваў. І гавораць — збірайся, суд сёння будзе”.
Святлана дадае, што не адчыніць дзверы яны проста не маглі — Павел знаходзіцца пад наглядам міліцыі і абавязаны пускаць праваахоўнікаў па першым патрабаванні. Яна лічыць, што затрыманне мужа звязанае з заўтрашнім Днём горада.
Нагадаем таксама, што 6 верасня ўвечары міліцыянты завіталі у офіс “Гавары праўду” і знеслі з сабой улёткі і сцягі з сімволікай кампаніі.
Дарэчы, учора на сайце "Беларускі партызан" Вінаградаў напісаў: "На гэтым тыдні пачнецца аперацыя "Байкот101", пра ход якой я буду інфармаваць цябе, дарагі чытач, пакуль Цэнтр Ізаляцыі Правапарушальнікаў не разлучыць нас"...
На Акрэсціна Вінаградаў сёлета ўжо правёў дзясяткі сутак адміністрацыйнага арышту.
Фота — bymedia.net
