Ва Украіне правядуць экспертымент з венесуэльскай нафтай для Беларусі

Але, паводле слоў украінскага ўрадоўца, гэты эксперымент яшчэ не азначае, што нафта з Венесуэлы будзе пастаўляцца на беларускія нафтаперапрацоўчыя заводы менавіта такім шляхам. Нагадаем, дагэтуль нафту прывозілі з Адэсы ў Беларусь па чыгунцы.

"Адэса-Броды будзе працаваць тады, калі мы канчаткова падлічым, што гэта — эфектыўны праект. Ніхто не будзе працаваць на страты. Будзе выгадна — будзем працаваць, як у прынцыпе, і нашы беларускія калегі, яны таксама кожную капейку лічаць. Менавіта таму мы зараз і паспрабуем прапампаваць пробную партыю, паглядзім, як гэта працуе тэхналагічна і эканамічна", — сказаў Андрэй Клюеў сёння на прэс-канферэнцыі ў Кіеве.

У той жа час Андрэй Клюеў абверг інфармацыю пра тое, што Украіна можа змяніць напрамак працы нафтаправода "Адэса-Броды" толькі за ўмовы згоды на гэты крок Расіі. "У якім накірунку пампаваць нафту, будзе вырашаць Украіна. Мы адкрыта працуем з расійскімі партнёрамі, і яны пра гэта ведаюць. Дарэчы, нафтаправод можа працаваць рэверс-аверс — часціну нафты прапампаваць у адным накірунку, а часціну — у іншым. Гэты нафтаправод быў хутчэй палітычным, чым эканамічным праектам. Таму зараз нам трэба думаць, як ён будзе працаваць, каб не дарма былі вытрачаны народныя грошы", — заявіў Андрэй Клюеў.

Першы віцэ-прэм'ер-міністр таксама паведаміў, што з чэрвеня праз тэрыторыю Украіны ў Беларусь транспартавана каля 1 мільёна тон нафты з Венесуэлы. "Для таго, каб залучыць і зацікавіць нашых беларускіх калегаў, мы зрабілі дастаткова сур'ёзную скідку на партавыя зборы і чыгуначныя перавозкі, бо павялічваючы аб'ёмы транзіту, чыгунка ўсё роўна будзе атрымліваць прыбытак", — дадаў ён.

Андрэй Клюеў падкрэсліў, што Беларусь будзе транспартаваць венесуэльскую нафту як праз Украіну, так і праз прыбалтыйскія краіны. "Мы плануем сёлета выйсці на 1 мільён тон, а праз год — на 9 мільёнаў тон. Хаця рэальна, транзіт нафты праз Украіну можа скласці каля 4-5 мільёнаў, а праз Прыбалтыку — 3-4 мільёна. Гэта дастаткова выгадны і цікавы для нас праект, таму што гэта павелічэнне грузапатоку праз Украіну, а таксама дадатковая праца для нашых партоў і чыгункі", — патлумачыў віцэ-прэм'ер.






Фота — Тэлеграф