Дарашкевіч і Козлік аштрафаваныя на 3 мільёны рублёў кожная

9 ЖНІЎНЯ

15.00. Юлія Дарашкевіч аштрафаваная на 3 мільёны рублёў.

14.44. Суддзя пайшоў абдумваць прысуд.

Фота — bymedia.net

14.38. Фотафакт: журналісткі не ўзгаднілі фотаграфанне з мядзведзікам з... Мінгарвыканкамам! Пра гэта напісана ў пратаколе затрымання Ірыны Козлік, журналіста газеты "Комсомольская правда в Белорусси".

З пратаколу вынікае, што каб зрабіць фота з мядзведзікам, да якога прымацаваная цыдулка з надпісам "Патрабаваць права на выказванне думкі ў Беларусі пагражае арыштам. Няўжо прэзідэнт арыштуе цацачных мядзведзікаў?", трэба ісці па ўзгадненне да сталічных чыноўнікаў!

14.30. Ірыну Козлік выклікалі на судовае паседжанне ў якасці сведкі.

14.05. Пасля 10-хвіліннага перапынку аднавіўся суд над Юліяй Дарашкевіч. Яна дае паказанні.

***

13.15 Ірына Козлік аштрафаваная на 3 мільёны рублёў. Журналістку "Комсомольской правды" аштрафавалі нібыта за несанкцыяваны пікет. Яна ўжо выйшла на волю (фота).

Пачаўся суд над Юляй Дарашкевіч. Яе таксама судзіць Дзмітрый Паўлючэнка.

Фота — bymedia.net

***

12.00 Сведкі-міліцыянты ў судзе распавялі пра затрыманне Дарашкевіч і Козлік. Па іх словах, спярша яны меркавалі, што дзяўчаты ладзяць пікет. Аднак потым нібыта зразумелі, што не было ніякага пікету і дзяўчаты не лаяліся матам.

У сувязі з гэтым адвакат Ірыны Козлік падала хадайніцтва, каб закрыць справу за адсутнасцю складу злачынства.

***

11.00 Першай пачалі судзіць Ірыну Козлік. Паводле хадайніцтва адваката выклікалі двух сведкаў затрымання.

У залу суда здолелі трапіць праваабаронцы Алена Танкачова, Уладзімір Лабковіч, журналісткі Вольга Бабак і Яніна Мельнікава.

У фэйсбуку Мельнікава паведаміла, як выступаў у зале сведка — спецназавец Сухалет: "Сухалет сцвярджае, што былі ў форме і прадставіліся. Яны вырашылі, што дзяўчаты ладзілі пікетаванне, бо быў мядзведзь і яны размаўлялі".

***

Журналістак будуць судзіць за "пікет шляхам фатаграфавання"

Ірыну Козлік і Юлію Дарашкевіч даставілі ў Савецкі суд у грамадзянскім легкавіку.

Каля будынка суда дзяўчат чакалі сябры і калегі — агулам каля 20 чалавек. Пра гэта паведамляе з месца падзеяў карэспандэнт Еўрарадыё Алесь Пілецкі.

Журналісткі паведамілі, што іх усю ноч трымалі ўдваіх у камеры ў Савецкім РУУС.

Як даведалася Еўрарадыё, судзіць затрыманых журналістак будзе Дзмітрый Паўлючэнка. Ён не трапіў у "чорны спіс" Еўрасаюза, хаця і выносіў асуджальныя прысуды затрыманым у снежня 2010 года. Гэтай вясной Паўлючэнка вынес апраўдальны прысуд нацболу Яўгену Контушу, абвінавачаму ў арганізацыі несанкцыяванага мерапрыемства.

***

Журналісткі Дарашкевіч і Козлік правялі ноч у Савецкім РУУС

У Цэнтр ізаляцыі правапарушальнікаў на Акрэсціна іх не дастаўлялі.

Як паведамляе журналіст Еўрарадыё Алесь Пілецкі, каля 10 гадзін раніцы дзяўчат вывезлі з пастарунку. Хутчэй за ўсё, іх даставяць у суд Савецкага раёна. Праўда, калегі не выключаюць, што дзяўчат могуць даставіць і ў гарадскі суд.

Нагадаем, што іх затрымалі падчас фотасесіі з плюшавым мядзведзікам. Фатографа Юлію Дарашкевіч і журналістку "Комсомольской правды" Ірыну Козлік вінавацяць у незаконым пікетаванні.

8 ЖНІЎНЯ

***

20.43 Міліцыянты адмовіліся прыняць ваду для затрыманых журналістак. Пра гэта паведаміў у сваім фэйсбуку грамадскі актывіст Міхась Пашкевіч.

Па яго словах, міліцэйскі начальнік заявіў: "Няхай адчуюць усе цягаты". Калегі не выключаюць, што ноч дзяўчатам давядзецца правесці ў Цэнтры ізаляцыі правапарушальнікаў на Акрэсціна, перадае Радыё "Свабода".

Вядома, што фатографа Юлію Дарашкевіч і журналістку "Комсомольской правды в Белоруссии" Ірыну Козлік змусілі пісаць тлумачальныя.

***

Увечары 8 жніўня міліцыянты затрымалі фатографа Юлію Дарашкевіч і журналістку "Камсамолкі" Ірыну Козлік. Пры затрыманні дзяўчат абвінавацілі ў правядзенні несанкцыяванага флэш-моба. Затрыманых даставілі ў Савецкае РУУС.

Нагадаем, журналісты ладзяць акцыю салідарнасці з затрыманым Антонам Сурапіным, які першым апублікаваў фотаздымкі мядзведзікаў, скінутых над Беларуссю са шведскага самалёта. Хлопца трымаюць у СІЗА КДБ і вінавацяць у дапамозе шведам, якія парушылі дзяржаўную мяжу Беларусі.