Зорка еўрапейскіх паэтычных слэмаў пакарыла Беларусь

26/02/2012 - 13:58

120227 Ma6a Slam.mp3

Паэтычны слэм — штука для Беларусі не частая, але вельмі прыкольная. Сутнасць яе заключаецца ў тым, што збіраюцца паэты, пранікаюцца атмасферай імпрэзы і пакараюць гледачоў арыгінальнасцю сваёй паэзіі і ўласным артыстызмам. А калі ўявіць, што слэм жаночы і што паэтак 15, і што сярод іх ёсць не толькі беларускі, але і ўкраінкі са шведкамі, можна проста абамлець. Што і рабілі наведвальнікі першага жаночага слэма, які мінуў у межах паэтычнага фэста “Вершы на асфальце”, прысвечанага 75-годдзю Міхася Стральцова.

Аксана Данільчык

На дэманстрацыю свайго таленту паэткі мелі па тры хвіліны, пасля чаго строгае журы, якое складалася з гледачоў ці паэтаў-гледачоў, ставіла самую, вядома, аб’ектыўную адзнаку. У выніку перамогу падзялілі экспрэсіўная Вера Бурлак і дасведчаная і жаноцкая шведка Солья Крапу.

“Я думаю, што вынікі былі вельмі суб’ектыўнымі, таму што я суб’ектыўна заўзела за Солью Крапу і Веру Бурлак, і яны суб’ектыўна перамаглі, — дзеліцца сваім меркаваннем паэтка-ўдзельніца слэму Валярына Кустава. — І натуральна, што гэта было натуральна, бо калі б не перамагла Вера, я не ведаю, хто б перамог. Солью я чула яшчэ некалькі месяцаў таму ў Берліне, і яна там таксама зорка слэмаў — іхніх інтэлігентных, вытанчаных, шведскіх слэмаў. Таму перамаглі акурат тыя, за каго я заўзела”.

Валярына Кустава

Олена Стэпаненка (Украіна)

Вядоўца імпрэзы Андрэй Хадановіч

Цалкам згодная з вынікамі слэму і паэтка Раіса Баравікова, якая бачыць у падобных імпрэзах карысць для развіцця беларускіх паэтычных шоў.

Раіса Баравікова: “Канчатковы вынік быў выключна справядлівы і ў такой нашай беларускай традыцыі, таму што перавагу аддалі госці — так яно і павінна быць. Бо ў яе ўжо ёсць досвед, яна шмат разоў удзельнічала ў такіх імпрэзах, таму гэта нават было нейкім чынам як перайманне досведу, як вучоба. І гэта карысна, каб потым нам рабіць свой яркі працяг”.

Раіса Баравікова

Дарэчы, сама Раіса Андрэеўна адмовілася ад удзелу ў слэме з-за... страху перад невядомасцю.

“Паколькі я сутыкнулася з гэтым ўпершыню, я не змагла зарыентавацца, якога кшталту чытаць вершы. Вось цяпер у мяне ўжо ёсць уяўленне, што трэба, каб быў момант гульні, каб прадэманстраваць свае акцёрскія здольнасці, і таму, скажам, у наступны раз я, магчыма, і рызыкну. Але ўжо загадзя падрыхтую адпаведныя творы”, — абяцае ўсенародна любімая паэтка.

Мары Сілкеберг

Самым складаным падчас свайго сэту пераможца слэму Солья Крапу лічыць моўную прорву паміж сабой і гледачамі.

Солья Крапу: “Спачатку я вельмі нервавалася, але потым з кожным новым выступам рабілася прасцей і прасцей, я ўваходзіла ў ролю. Самае цяжкае — усведамляць, што маю мову ніхто не разумее і ўсё адно я мушу ім нешта казаць. Таму для мяне заўсёды лягчэй, калі ёсць хаця б нехта адзін, для каго я магу гэта распавесці”.

Солья Крапу

Каця Зыкава

Маргарыта Аляшкевіч

Паводле слоў літаратара Сяргея Балахонава, перамога абедзвюх паэтак мела пад сабой падставы.

Сяргей Балахонаў: “Адчувалася, што Солья мае досвед у параўнанні з нашымі паэткамі. Але яшчэ да таго, як слэмы ўвогуле ў нас былі, некаторыя адзначыліся ў даслэмаўскі перыяд. Тая самая Вера Бурлак. Магчыма, гэты досвед таксама сыграў ролю”.

Сяргей Вераціла

Анка Упала

Юлія Цімафеева

Дарэчы, падчас імпрэзы мы задаліся пытаннем: чаму менавіта жаночы слэм стаў “цвіком праграмы” паэтычнага фэсту? Чаму не мужчынскі? Таму разам з прыўкраснай Валярынай Куставай мы вырашылі патрабаваць мужчынскага слэму!

Валярына Кустава: “У нас няма мужчынскіх слэмаў — я шкадую пра гэта і таксама патрабую мужчынскага слэму, я б з задавальненнем палюбавалася на іх усіх, не супернічаючы і ставячы адзнакі”.

Спадзяемся, нашы патрабаванні пачуюць мужчыны-паэты і кінуцца ў слэм пры першай нагодзе.

Таццяна Нядбай