Са Следчага камітэта патрабуюць 100 тысяч долараў за маленькую літару "в"
Жыхар Латвіі Аляксандр Міхайлаў патрабуе ад Следчага камітэта Беларусі 200 тысяч рублёў кампенсацыі за абразу (амаль сто тысяч долараў), піша "Новы час".
У афіцыйнай перапісцы з Міхайлавым Следчы камітэт неаднаразова называў яго на "вы" з маленькай літары. Між тым па правілах беларускай мовы, замацаваных законам, у афіцыйнай перапісцы пры звароце "Вы" патрэбная вялікая літара. Мужчына палічыў гэта за абразу і прыніжэнне свайго гонару і годнасці.
Ён падаў на Следчы камітэт у суд пазоў аб абароне гонару і годнасці. Ён патрабаваў кампенсацыі ў памеры 80 тысяч рублёў. Праўда, суд Партызанскага раёна Мінска скаргу не задаволіў. Пасля гэтага Міхайлаў і яго адвакат Сяргей Зікрацкі падалі апеляцыю. І сума пазову вырасла да 200 тысяч рублёў.
На судзе высветлілася, што за ліставанне з Міхайлавым адказваў намеснiк начальнiка ГСУ ЦА Следчага камiтэта Д. Вараб’ёў. Ён напісаў у суд заяву, у якой выклаў сваю пазіцыя па справе. Аднак суд адмовіў адвакату пазоўніка Сяргею Зікрацкаму, які прасіў магчымасці азнаёміцца з заявай. Таксама суд адмовіў Міхайлаву, які хацеў самастойна даваць паказанні праз скайп. Не пусцілі на суд і аднаго з адвакатаў Міхайлава, бо той спазніўся.
Дарэчы, Міхайлаў папрасіў скласці на Вараб'ёва яшчэ і пратакол за парушэнне заканадаўства. Жыхар Латвіі тройчы (27 студзеня, 3 i 10 лютага 2019 года) звяртаўся да прадстаўніка Следчага камітэта з хадайніцтвамі па-беларуску, але атрымаў адказы на рускай мове, што супярэчыць "Закону аб зваротах грамадзян".
