"Шахцёр", "Дынама" і "Мінск" 18 ліпеня згуляюць у Лізе Еўропы
Салігорскі "Шахцёр" і мінскае "Дынама" правядуць свае матчы 2-га кваліфікацыйнага раўнда Лігі Еўропы на хатніх стадыёнах, "Мінск" — у гасцях.
На сайце "Шахцёра" змешчаны зварот да заўзятараў, у якім каманда абяцае “зламаць праклён стартавых еўракубкавых раўндаў” — “бо мы выдатна разумеем, што ўвесь Салігорск зачакаўся перамогі на міжнародным узроўні”. Лідары чэмпіяната Беларусі згуляюць на сваім полі супраць малдаўскага "Мілсамі".
Трэнер мінскага "Дынама" Роберт Мааскант на перадматчавай прэс-канферэнцыі не стаў хаваць, што "Лакаматыў" з Заграба — супернік сур'ёзны. Але, па словах спецыяліста, сталічны клуб будзе гуляць толькі на перамогу.
"Мінск" адпраўляецца ў вандроўку на Мальту, дзе сустрэнецца з мясцовай "Валетай". Сайт клуба паведамляе, што ў першым матчы супраць мальтыйцаў на поле не змогуць выйсці Мікіта Букаткін і Іван Маеўскі. Першы прапускае матч з-за леташняй дыскваліфікацыі, а другі яшчэ не цалкам аднавіўся пасля траўмы. Тым не менш, абодва футбалісты трапілі ў заяўку “Мінска” і будуць назіраць за матчам з трыбунаў.
