Шорац загадаў скараціць закуп імпартнага харчавання для школьных сталовак
Скараціць закуп імпартнага харчавання для ўстаноў адукацыі загадаў старшыня Мінгарвыканкама Андрэй Шорац. Гэта робіцца для таго, каб зрабіць абеды больш таннымі, перадаюць "Мінск-Навіны".
Гэтае пытанне абмяркоўвалася 23 сакавіка на пасяджэнні Мінгарвыканкама. Намеснік начальніка галоўнага фінансавага ўпраўлення Мінгарвыканкама Сяргей Бурачэўскі заявіў, што адміністрацыі раёнаў і камітэт па адукацыі не прымаюць належных мераў, каб зрабіць стравы больш таннымі. Ён спаслаўся на маніторынг, праведзены Міністэрствам антыманапольнага рэгулявання і гандлю. Гэты маніторынг выявіў, што падчас гатавання страваў выкарыстоўваюцца дарагія харчовыя прадукты, закупленыя ў гандлёвых сетках, а не ў вытворцаў.
Кіраўнік Мінска Андрэй Шорац даручыў вызначыць пералік імпартных прадуктаў харчавання, якія могуць быць закуплены для школаў, бо не вырабляюцца ў Беларусі, адсутнічаюць у сувязі з сезоннымі асаблівасцямі або па іншых аб'ектыўных прычынах. На яго думку, закупляць дарагія імпартныя яблыкі або цыбулю пры наяўнасці аналагічнай айчыннай прадукцыі нельга.
