Штукатуру прысудзілі 3 гады калоніі за "адмаўленне генацыду беларускага народа"
Андрэй Савіцкі / фота з акаўнту ў "Аднакласніках"
У Беларусі вынесены першы прысуд за "адмаўленне генацыду беларускага народа".
Суд над 55-гадовым штукатурам з Мінскага раёна Андрэем Савіцкім пачаўся напрыканцы кастрычніка. 30 кастрычніка яму прысудзілі тры гады калоніі агульнага рэжыму. Акрамя "адмаўлення генацыду" мужчыну прызналі вінаватым у "абразе Лукашэнкі".
Падставай для судовага пераследу сталі пасты Савіцкага ў адкрытай групе, якую ён стварыў і адміністраваў у сацсетцы "Аднакласнікі". У прыватнасці, тыя, што датычылі Хатынскай трагедыі. Як вынікае з афіцыйных крыніцаў, мужчына задаваўся пытаннем, якой была роля партызанаў у тым, што нацысты спалілі Хатынь.
Паводле звестак праваабаронцаў, Савіцкага затрымалі ў лютым і ўзялі пад варту. Затрымлівалі яго байцы САХР і ГУБАЗіК. Пасля затрымання прэс-служба МУС пісала: "У сваіх публікацыях фігурант адмаўляў генацыд беларускага народа з боку нямецкіх захопнікаў падчас Вялікай Айчыннай вайны, рэабілітуючы фашыстаў і прыпісваючы савецкім грамадзянам злачынствы, учыненыя акупантамі".
Справу Савіцкага ў Мінскім гарадскім судзе разглядаў Яўген Пісарэвіч, які неаднаразова адзначыўся ў палітычна матываваных судовых працэсх.
